الجديد Nouveau

عام الباك

يا حْليلي منْ عامِ الباكْ         مرْعوب و قلْبي محْتارْ
ما فادشْ فيها التّمْباكْ           و لا حَلْوِة لولادْ  صْغارْ
×××
باكْ الثّوْره أنا عدّيتو               عامْ الثّوْرة ع الدّمّارْ
أنا عْرفْتو ملّي بديتو               عامْ سخونْ يا حُضّارْ
×××
م القصْبه حتى القصْرينْ      و نا نجْري منْ دارْ لْدارْ
ثوْرة خْلعْنا فيها الزينْ              و حققْنا عْليه انْتصارْ
×××
فدّيت و ما لقيتشْ بيها            هربْت لْقهْوةْ عمْ مخْتارْ
قلت نحضّر باكي فيها              و مولاها ربّي الجبّارْ
×××
لْقيتْ شْكبّه و نقاشاتْ              في السّياسه و الاشْعارْ
و مْزاودْ و رابْ و شاتْ           و مْلاوي منْ بيتْ النّارْ
×××
عدّيتو نشْطحْ و نْغنّي               و الاّ نَّاقش في الخنّارْ
و نلْعبْ بالبنّي بنّي                      ربّي تسْترْ يا ستّارْ
×××
بينْ ذْهيبه و راسْ جْديرْ           في باليَ نا عْملْتْ آفارْ
نْصبْت الخيمة للتّحْضيرْ         كيفْ فْصعْت أنا م الدّارْ
×××
ولاّتْ صْوارخْ و قْنابيلْ               بينْ مْعمّرْ و الثّوّارْ
وسْط الخيمه شفْت الويلْ               م الرّهبه كاينّي فارْ
×××
ذقت الجوعْ,شْتقْتْ اخْواتي        خفْت هْربْتْ من الدّمّارْ
شلاّقاتـــــي و ملاّقاتي         رْجعْتْ لْقهْوةْ  عمْ  مخْتارْ
×××
قهْوة أرْحمْ م القْنابلْ                  قهوة أرْحمْلي م الدّارْ
و  تْخلّطْ حابلْ بالنابلْ            ولّيتْ عايشْ في معْصارْ
×××
هاو قالو لوّح عْليكْ                     راهو الباكْ كلّو أسْرارْ  
باكْ الثورة صْعيب عْليكْ                 رخكْ منّو لا تحْتارْ
×××
قالو لوّحْ ها البْلوزهْ                    حرْقهْ أسْهلْ م الدّفْوارْ
عدّيها في اللّمْبادوزهْ                     و م التْبقْ لْبيتْ النارْ
×××
بعْتْ أدْباشي للحمّاصْ                  و رْهنْت مْفاتح الدّارْ
و تجمّعْنا في البلاصْ                    ما فينا حتى طرْطارْ
×××
و حرقت مع ولاد الحومه                 لا بسبور و لا مطارْ
ياخي طلعتْ عمْله مْشومه           حصْلتْ منْها برْشه اضْرارْ
×××
خسرت أوراقي و حويجاتي              و خرّجني بابا م الدّارْ
وْ ضاعتْ منّي أحلى اوقاتي       و ما عادْ عنْدي حتّى أعْذارْ
×××
هاوْ قالو ركْحت لومورْ                و بقدْرة ربّي السّتّارْ
وْ عم الباجي فهمْ الدّورْ                و قصّلنا بونو بمنْشارْ
×××
قالْ لبابا فكّ عليكْ                      رجّعْ ولْدكْ توْ للدّارْ
و انْ شا الله ربّي يهديكْ            طالْ عْذابو م المشْوارْْ
×××
خلّي يدزْ عْليكْ البابْ              راهو تعلّمْ ملّي صارْ
يزّي ما خالّطْ عُزّابْ         و ما جربْ منْ ضرْبْ الطّارْ
×××
فيسعْ ما نْسيتْ إلّي فاتْ              و  تقالتْ عنّي الأعْثارْ
عمَلْت يْديده و سْويقاتْ        وْ جبْتْ أصْحابي للتّحْضارْ
×××
و تمحْرثْت مْديده قْصيره           و  جْمعْت لْويله مْعَ نْهارْ
و توّه فاتتْ فتْره عْسيرهْ                    الله لا يْعاودْ منْكارْ
×××
و هاني توّه الباكْ بديتو                   و مْعمّلْ ع الانْتصارْ
          و نْجاحي للخضْرا هْديتو                   وْ ليكمْ انتمْ يا نظّارْ              

                                                     محمد الهادي الكعبوري.        
                                                                                           منزل جميل 10 جوان2011
  Partager